يل بنت سلمى كلمات الشاعر وليد أيوب

سلمى في عيدها الـ 14 شعر::: وليد ايوب  يا بنتي سلمى صرتي صبيّة   بنت اربعتاش كنّو سبحانو أعطاكي هذا الاسم، سلمى  ورسم الكسم أحلى ما خلق  ريتا العين اللي تشوفك  وما تصلّي عالنبي المختار  يبلى صاحبها بنار تحرقلو قلبو  وعمى ما يقشع لدربو  يا بابا من يوم ما خلقتي  وسمّيتك أنا عإسم تيتا  اللي حبّتك حبّ لا يوصف  ولا انكتب في كتاب   كنتي يا بنتي ساكنة بحضنا  اكثر من سريرك  ولمّا وعيتي وصار عمرك سنة  وصرتي تدرجي وتكرجي  ومشيتي،   وياما خرّبتي وكسّرتي  عقلبها زي العسل  ولما ماما مها تغضب وتتعصبن  ويطق شرش العقل في راسها  تصير تيتا تتمسكن  تتحميكي من شرّها وعقابها  كان الكف اللي توكليه منها  تحسّو في قلبها سكين  ولما هلّو خواتك التوم   قلت بيني وبين حالي   إسة حبّها إلك أكيد  راح ينقص ويتوزّع  لكن الحب اللي حملتو بقلبا   كان يكفي كون، وزيادة  من ام شحادة لفؤاد ارشيد  وتقولّك تتعلّمك وتعيد  وكنتي يا بنتي ذكية وشاطرة  رأسا تلقطي الكلمة،  وتطرب، وتحسّ بدها توكلك، وتقول  حوطّك باسم الله، يا تيتا شو نغشة   كانت تكون تعبانة وعيّانة  لكنها كانت تقوم وتكابر  وألّا مين بدّو يطبخ المحشي؟!! يا سلمى تيتا انتشر صيتا  كانوا الناس يقصدو لمعلّة سلمى   يلفو على بيتها  من بيت جنّ والدبّة  يشهد عليّ ربّي  تعطي كل مين قصدها   ويركبها ندم  لو ما لاقت فراطة  تعطيها لاي محتاج يدقّ بابها  وكانت ذكية،  وقوية  بالهندسة والجغرافيا والتاريخ  وفي جميع العلوم   حتّى أنّها كانت تجادلني في اختصاصي،   اللغة العربية   وتعرف التاريخ الاسلامي  وتتحدّث عن رسولنا الكريم  بكلام حميم  كما تعرف طريق الجلجلة  كأنها سارت إلى صلبها فيها  يا بنتي انت بتشبهيها  بالشطارة وحسن العبارة  نحفاوية راموية  مسلمة مسيحية  ولحسّادك، ياللي روسهن ما بتوصل كتافك  راح تعمليلهن جلطة دماغية.. بهالخلطة